DİN yayılan videogörüntülərə münasibət bildirdi
Sosial şəbəkələrdə vətəndaşın övladı qarşısında polis təzyiqinə məruz qaldığını görüntüləyən video yayılıb. Hadisənin Dərnəgül ərazisində baş verdiyi bildirilir. Şahidlərin sözlərinə görə, polis azyaşlı övladının yanında vətəndaşa zorakılıq göstərərək, onu polis maşınına mindirir. Bu zaman atasına kömək etmək istəyən azyaşlı da kobud rəftarla üzləşir.
Daxili İşlər Nazirliyinin mətbuat xidmətindən məsələyə münasibət bildirilib. Qurumdan deyilir ki, vətəndaşa qarşı hər hansı fiziki təzyiq göstərilməyib, iddiallar əsassızdır:
“Qanunsuz əlvan metal daşıdığı üçün Nərimanov rayonu ərazisində Bakı Şəhər Baş Polis İdarəsi Dövlət Yol Polisi İdarəsinin yol patrul xidmətinin əməkdaşları tərəfindən Vüqar Mahmudovun idarə etdiyi “VAZ 21-011” markalı avtomobilə “saxla” işarəsi verilib. Sürücü yol polisinə tabesizlik göstərərək polisin qanuni tələblərindən müxtəlif vasitələrlə yayınmağa çalışaraq, yanında olan azyaşlı övladını bərkdən-bərkdən qışqırmağı, yaxınlıqda olan vətəndaşların diqqətini cəlb etməyi tapşırıb.
Tabesizlik göstərən sürücü əraziyə çağırılan Əlahiddə Çevik Polis Alayının naryad qrupu tərəfindən Nərimanov Rayon Polis İdarəsinin 17-ci Polis Şöbəsinə təhvil verilib.
Qeyd olunan hərəkətlərdə polis işçisinin və ya hərbi qulluqçunun qanuni tələbinə qəsdən tabe olmama maddələrinin tərkib əlamətləri olduğuna görə fakta görə İnzibati Xətalar Məcəlləsinin 535-ci maddələri ilə onun barəsində toplanmış materiallar baxılması üçün Nərimanov Rayon Məhkəməsinə göndərilib”.
