"80-ci illərdə Ərəblər kəndinə qaz çəkilib"

Source: Foto: Meydan tv

Caption: "80-ci illərdə Ərəblər kəndinə qaz çəkilib"

Ərəblər kəndinin sakinləri qaz istəyir

“Magistral yolun cəmi 1 kilometrliyində olan kənd niyə yaddan çıxır?

Şabran rayonunun Ərəblər kəndinin sakinləri 20 ilə yaxındır mavi yanacaq üzünə həsrət qalıblar. Sakinlər evlərini qızdırmaq və yemək bişirmək üçün odun sobasından istifadə edirlər.

Ara-sıra rayon, ölkə rəhbərliyinə üz tutan kənd sakinləri şikayətlərini Meydan TV-yə də ünvanlayıblar. Onların sözlərinə görə, illərdir döymədikəri qapı, müraciət etmədikləri ünvan qalmayıb, amma qonşu kəndlərə verilən qazdan Ərəblərə gəlib çıxmır ki, çıxmır. Bunu özlərinə qarşı ögey münasibət kimi dəyərləndirirlər.

“80-ci illərdə Ərəblər kəndinə qaz çəkilib. Təxminən 10 il qazdan istifadə edə bildik. Sovetlər dövründən sonra qonşu kəndlərin də, bizim də qazımız kəsildi. Amma sonralar bütün qonşu kəndlərdə qazın verilişi bərpa olundu, biz kənarda qaldıq”, - sakinlərdən biri deyib.

Kəndlilər hər il qış gələndə dağlara, meşələrə üz tutub odun tədarükünə başladıqlarını söyləyirlər.

Ərəblər Şabran rayon mərkəzindən çox da uzaqda deyil. Sakinlərdən Azər Məmmədovun sözlərinə görə, ucqar dağ kəndinə qaz çəkilir, amma magistral yolun cəmi bir kilometrliyində olan Ərəblər yaddan çıxır. O, bunun səbəbini hələ də öyrənə bilmədiklərini deyir.

Özünü söyadı ilə təqdim edən G.Xalıqov isə bildirir ki, qaz üçün dəfələrlə Şabran Rayon İcra Hakimiyyətinə üz tutub. O, hər il övladlarının çörək pulundan kəsib odun aldığını deyir: “Qışda günlərlə ət, yağ üzünə həsrət qalırıq. Odun tapanda ət ala bilmirəm, ayda 300 manat maaşla 6 nəfərlik ailəni dolandırmaq mümkün deyil. Qışda cəmi 1 gün qonaq olsunlar, dolanışığımızı gözləri ilə görsünlər”.

İmkanı olanlar meşədən kəsilib doğranmış odunu maşınla alır, imkansızlar isə at arabası ilə dağlardan özləri qırıb gətirirlər. Bir maşın odunun qiyməti isə 300 manatdır. Sahinlərin sözlərinə görə, 4-5 nəfərlik, o qədər də böyük olmayan ailə qənaət etməklə, qış mövsümü ərzində ən azı iki maşın odun istifadə edir. Bu isə həm daimi iş yeri olmayan kənd sakinlərinin ailə büdcəsinə zərbə vurur.

“Bu gedişlə həyətimizdə də yaşıllıq qalmayacaq, hamısını qırıb yandıracağıq. Biz də istəyirik ki, başqa kəndlərdəki kimi qazımız olsun. Nə vaxta kimi üst-başımızdan his iyi gələcək?”, - sakinlər deyiblər.

"Odun tapanda ət ala bilmirəm,  ayda 300 manat maaşla 6 nəfərlik ailəni dolandırmaq mümkün deyil"

"Odun tapanda ət ala bilmirəm, ayda 300 manat maaşla 6 nəfərlik ailəni dolandırmaq mümkün deyil"

Source: Foto: Meydan tv

Şikayətçilərin sözlərinə görə, 60 ailədən ibarət kəndin qazlaşdırılması ilə bağlı dəfələrlə rayon icra hakimiyyətinə və digər orqanlara şikayət ediblər. Lakin qaz əvəzinə onlara həmişə vəd verilib:

“2012-ci ildə kəndə qaz çəkmək adı ilə köhnə boruları da kəsib apardılar. Neçə ildir icra hakimiyyətinə qazla bağlı yazılı müraciət edirik. Son bir neçə ay ərzində isə 3 dəfə yığışıb Şabran Rayon İcra Hakimiyyətinə getmişik. Həm yeni icra başçısı Asif Hüseynovun, həm də müavinin qəbulunda olmuşuq. Onlar bizə deyiblər ki, bu məsələdə əllərindən heç nə gəlmir, qazlaşma işinə “Azəriqaz” baxır. Hətta onu da dedilər ki, gedin, sizə ucuz qiymətə odun təşkil edərik. Axı bir dəfə 5-10 manat ucuz odun almaqla dərdimiz sağalmayacaq. Biz də normal insan kimi yaşamaq istəyirik, başqa kəndlər kimi Ərəblərə də qaz çəksinlər. Belə getsə, yığışıb Bakı-Quba yolunu bağlayacağıq”, - şikayətçilərdən biri deyib.

Dövlət Neft Şirkətinin rəsmi məlumatında bildirilir ki, ölkədə qazlaşdırma 90 faizi ötüb. Amma qeyri-rəsmi məlumatda xüsusilə dağ kəndlərində qaz yoxdur. “Azəriqaz” İstehsalat Birliyinin mətbuat xidmətindən Meydan TV-yə deyilib ki, artıq ərazilərin qazlaşdırılması ilə bağlı bu il üçün olan proqram tamamlanıb. 2019-cu il üçün nəzərdə tutulan 92 yaşayış məntəqəsi və yaşayış massivinin qazlaşdırılması noyabrın axırına qədər başa çatacaq. Yaxın dövr üçün bu kəndin siyahıya salınması mümkün deyil.

"2012-ci ildə kəndə qaz çəkmək adı ilə köhnə boruları da kəsib apardılar"

"2012-ci ildə kəndə qaz çəkmək adı ilə köhnə boruları da kəsib apardılar"

Source: Foto: Meydan tv

Qurumdan həmçinin deyilib ki, gələn il üçün nəzərdə tutulan proqrama Ərəblər kəndinin salınıb-salınmaması mart-aprel aylarında bəlli olacaq:

“Hər hansı yaşayış məntəqəsinin qazlaşdırılması üçün yerli icra hakimiyyətləri təkliflə çıxış etməlidirlər. Onların təklifləri Nazirlər Kabinetinə təqdim edilir və büdcə ayrılan zaman həmin müraciət də öz əksini tapır. Təbii ki, “Azəriqaz”dan da rəy alırlar. Vəsait ayrıldıqdan sonra “Azəriqaz” kəndlərin qazlaşdırılmasını həyata keçirir”.

Şabran Rayon İcra Hakimiyyətindən Meydan TV-yə bildirilib ki, onlar hər il təkliflərində Ərəblər kəndinin də qazlaşdırılması məsələsinə toxunurlar. Lakin bu problemin nə vaxt həll olunacağı ilə bağlı məlumatları yoxdur.

While you are here …

We have a small favor to ask of you. In an environment where information is under tight government control, Meydan TV works hard to ensure that people have access to quality independent journalism. We shed light on stories you might otherwise not read because we believe that those who cannot speak up deserve to be heard, and those in power need to be held accountable. We invest considerable time, effort and resources to do so, which is why we need your help.

Your support empowers our courageous journalists, many of whom work at great personal risk to freedom and safety. Every contribution to the protection of independent journalism in Azerbaijan matters. Thank you.

SUPPORT US
Featured in:  
Shortlink:   http://mtv.re/l40o2i

Most Viewed