Yaqut Məmmədova

Source: meydan tv

Caption: Yaqut Məmmədova

Ana: Dövlət pulsuz dərmanlarla təmin etsəydi, biz də dolanışığımız haqqında düşünərdik

''2017-ci ildə özümə qəsd elədim, sirkə içdim ki, bunları görməyim, lakin həkimlər həyatımı xilas etdilər''

“Oğlum doğulan gündən xəstəxanalarda qalmışıq. Dərdinə çarə tapılmır. İynə-dərman təsir etmir, uşağın vəziyyəti hər keçən il ağırlaşır. Altı ildir ki, ona makaron və quru çörəkdən başqa heç nə yedizdirə bilmirəm”.

Bu sözləri Meydan TV-yə Mingəçevir şəhər sakini Yaqut Məmmədova deyir. Onun sözlərinə görə, 2010-cu il təvəllüdlü oğlu Ayxan irsi hemolitik anemiya (qırmızı qanın parçalanması-red.) xəstəliyindən əziyyət çəkir:

“Uşaq doğulanda sarılıq (qaraciyərin və ya ödün funksiyasının pozulması nəticəsində baş verən xəstəlik-red.) oldu. Həkimlər ciddi nəzarətə götürdülər, sistemlər qoşuldu, körpə düzəldi. Üç yaşına qədər hər şey normal idi. Səhhətində heç bir problem yox idi. Müəyyən yaş həddinə çatmışdı deyə bütün yeməklərdən yeyə bilirdi. Lakin qəfildən gözlərinin ağı və sifəti saralmağa başladı. Mingəçevirdə həkimə apardıq, yoxlatdırdıq, qan analizi verdik. Dedilər ki, buralıq deyil, Bakıya aparın. Bakıda “Semaşko”ya (1 saylı Şəhər Kliniki Xəstəxanası-red.) apardıq. Orada məlum oldu ki, uşağın ödündə anadangəlmə daş var. Həkimlər dedi ki, gözünün saralması da bundandır. 2014-cü ildə uşaq “Semaşko”da əməliyyat olundu, lakin bununla səhhəti düzəlmədi. Bakıda gəzmədiyimiz xəstəxana qalmadı, dedilər ki, kaş, əməliyyat olunananda dalağı da götürüləydi. İndi dalağında qırmızı qan parçalanır. Onu da deyim ki, bizim uşaqda ağ qan xəstəliyi (leykoz-red.) yoxdur. Hemotologiya İnstitutunda oğluma mütəmadi müalicə kursu keçirilir. Dalağında və qaraciyərində şişmə yoxdur. Həkimlər deyir ki, dalağında şişmə olsa, əməliyyat edib, götürəcəyik. İş burasındadır, dalaq şişsə, əməliyyat olunub, götürülsə, uşağın digər orqanlarına ziyan olmayacağına, onun yaşayacağına zəmanət verilmir”.

Yaqut Məmmədovanın sözlərinə görə, həkimlər anadangəlmə anemiyaların tam sağalmasının mümkün olmadığını deyir. Dərman və müalicə preparatlarının baha olduğunu bildirən şikayətçi, Birinci vitse-prezident Mehriban Əliyevaya məktub yazıb:

Stasionar xəstənin tibbi kartasından çıxarış

Stasionar xəstənin tibbi kartasından çıxarış

Source: meydan.tv

“Daha doğrusu, Mingəçevir Şəhər Mərkəzi Xəstəxanasının baş həkimi mənim adımdan məktub yazıb. Cavabı həmin xəstəxanaya yönləndirdilər. İndi bilinmir ki, uşağın müalicəsi və dərmanlarını hara verməlidir. Səhiyyə Nazirliyindən deyirlər ki, xəstəni pulsuz dərmanlarla Mingəçevir Şəhər Mərkəzi Xəstəxanası təmin etməlidir. Mingəçevir Şəhər Mərkəzi Xəstəxanasından da deyirlər ki, yox, buralıq deyil. Başımızı itirmişik, imkanımız yoxdur. Özüm də beş-on manat pula xadimə işləyirəm. Yoldaşım da fəhlədir. Uşağın müalicəsinə hər ay ən azı yüz manat pul xərclənir. Kənardan kimsə soruşanda ki, bu uşağın niyə rəngi belədir, gözləri saralıb, ürəyim qırılır. Özümə gələ bilmirəm ki, niyə uşağıma elə deyirlər. Anayam, ürəyim dözmür. Ona görə də 2017-ci ildə özümə qəsd elədim, sirkə içdim ki, bunları görməyim, lakin həkimlər həyatımı xilas etdilər”.

Şikayətçi söyləyir ki, Hemotologiya İnstitutunda keçirilən müalicə kursunun oğlunun səhhətini çox cüzi yaxşılaşdırır. Amma bir müddətdən sonra vəziyyəti yenidən pisləşir:

“Sistem qoşulanda istər-istəməz qanını təmizləyir. Beş-on gün uşağın səhhəti yaxşılaşır. Gözünün və dərisinin sarılığı çəkilir. Yanından azacıq meh əsən kimi yenə uşağın halı xarablaşır. Beş gün məktəbə gedirsə, on beş gün evdə xəstə yatır. Bu uşaq bütün günü iynə-dərmandadır. Əvvəllər çox əsəbi idi, nə deyirdin, əlinə keçəni yerə çırpırdı, qışqırırdı. İndi bir balaca danışığı düzəlib. Hər dəfə həkimə gətirəndə, böyük bir resept yazıb verirlər. Bir çox halda firmanın bahalı dərmanlarını yazırlar. Bütün müalicələri edirik, heç bir irəliləyiş olmur. Dövlət pulsuz dərmanlarla təmin etsəydi, biz də dolanışığımız haqqında düşünərdik”.

Səhiyyə Nazirliyindən Meydan TV-yə deyilib ki, valideyn İcbari Tibbi Sığorta üzrə Dövlət Agentliyinə müraciət etməlidir. Çünki 2 ildir Mingəçevir, Ağdaş və Yevlax şəhərlərində icbari tibbi sığorta sistemi tətbiq olunur.

İTS Agentliyinin mətbuat xidmətindən Meydan TV-yə bildirilib ki, Ayxan Məmmədovun ailəsi ilə əlaqə yaradıb, uşağın səhhəti ilə bağlı məsələnin diqqətdə saxlayacaq, lazımi tədbirlər görüləcək.

Stationar xəstənin tibii kartasından çıxarış

Stationar xəstənin tibii kartasından çıxarış

Source: meydan.tv

While you are here …

We have a small favor to ask of you. In an environment where information is under tight government control, Meydan TV works hard to ensure that people have access to quality independent journalism. We shed light on stories you might otherwise not read because we believe that those who cannot speak up deserve to be heard, and those in power need to be held accountable. We invest considerable time, effort and resources to do so, which is why we need your help.

Your support empowers our courageous journalists, many of whom work at great personal risk to freedom and safety. Every contribution to the protection of independent journalism in Azerbaijan matters. Thank you.

SUPPORT US
Featured in:  
Shortlink:   http://mtv.re/47d614

Most Viewed