4 il qaranlıqda yaşayan ailə

“Sayğac üçün ödədiyim pulu kreditə götürmüşdüm”

Source: Meydan TV


“Sayğac üçün ödədiyim pulu kreditə götürmüşdüm”

Sabirabadın Xəlfəli kəndində yaşayan Abbasovlar ailəsi dörd ilə yaxındır evdə işıq yandıra bilmir. Sayğacın pulu ödənilsə də, işıq idarəsi cihazı quraşdırmağa, elektrik enerjisi verməyə tələsmir.


“Heç nədən incidirlər”

Ailə 2016-cı ilin sentyabrında kənddə özünə kiçik bir ev tikib. Amma işıq problemini heç cür həll edə bilməyiblər. İş əvvəlcə aylarla, sonra illərlə uzanıb. Sabirabad Elektik Şəbəkədə axırda bəhanə ediblər ki, sayğacın pulu ödənilməlidir.

“Keçən il dekabrın 16-da ASAN Xidmətdə sayğac üçün 209 manat köçürdüm. Dedilər ki, 160-170 manatlıq sayğaclar da var. Guya bu, daha yaxşısıdır. Söz verdilər ki, 20 gün ərzində gələcəklər. O vaxtdan gözləyirik. İşıq İdarəsi ilə ASAN Xidmət bir-birinin boynuna atır. Deyirlər ki, sənin sənədlərin səhvdir. Evin şəklini, çertyoju, bölgü planını aparmışdım. Konkret hansı sənədin səhv olduğunu demirlər. Heç nədən incidirlər. Əgər sənədlərimdə səhv vardısa, onda niyə sayğacın pulunu ödətdirirdilər?“, – Məhəddin Abbasov belə deyir.


“Söz verdilər, heç bir iş görmədilər”

Ailə danışır ki, Sabirabad Rayon Elektrik Şəbəkəsindən nümayəndə gəlib, yerli şəraitlə tanış olub. Həmin adam işıq idarəsinin ailəni elektrik enerjisi ilə təmin edəcəyinə söz verib. Bildirib ki, dirək basdırılacaq, sayğac quraşdırılacaq. Amma bütün bunlar söz olaraq qalıb. Heç bir iş görülməyib.

“Tezliklə dörd il olacaq ki, bu vəziyyətdəyik. İndi hansı dövrdür ki, işıqsız yaşayasan? Heç qaz da yox idi, bir aydır çəkdirmişik. Odun parçaları tapıb evi qızdırırdıq. Nə qədər belə yaşamaq olar? İnanın, ASAN Xidmətə ödədiyim pulu kreditə götürmüşdüm. 300 manat maaş alıram, bunun da hər ay 80 manatını kreditə verirəm. Qalan pula yaşamağa çalışırıq”, – Məhəddin ailənin acınacaqlı vəziyyətini təsvir edir.


“İcra Hakimiyyətində dedilər ki, get pambıq ək”

Ailə evdə, nəhayət, işıq yanmasını, haqqının bərpa olunmasını istəyir. Yaşayış şərtlərinin ağır olmasından çox danışmırlar. Amma hər şey göz qabağındadır.

Gülbikə Abbasova deyir ki, dövlət orqanlarına səslərini çatdırmağa çalışıblar. Heç nə alınmır: “İcra hakimiyyətinə getmişdim, dedilər ki, get, pambıq ək. Mən iki körpə uşaqla necə pambıq əkim? Həm indiki, həm də əvvəlki icra başçısının qəbulunda olmuşuq. Bircə onu deyirlər ki, düzələcək. Heç nə vaxt düzələcəyini də demirlər”.

Məhəddin əlavə edir ki, sosial yardım almaq üçün cəhd göstəriblər. Bu məsələdə də müsbət cavab almayıblar. Məhəddinin işlədiyini bəhanə gətiriblər. Halbuki, sosial müdafiə şöbələrində, adətən, əksini söyləyirlər. Yəni rəsmi iş yeri olmayanlara sosial yardım verilmir.

Sabirabad Rayon İcra Hakimiyyətindən Abbasovların onlara rəsmi şikayət ünvanlamadıqlarını deyiblər. Sabirabad Rayon Elektrik Şəbəkəsindən isə Meydan TV-yə deyiblər ki, məsələni araşdıracaqlar.

Həmin ev
Həmin ev
Sənədlər
sənədlər
Sənədlər
Sənədlər
Ana səhifəBölgə4 il qaranlıqda yaşayan ailə