Məcburi köçkünlər odun sobasından istifadə edirlər

Mənbə: Foto: Meydan TV

Başlıq: Məcburi köçkünlər odun sobasından istifadə edirlər

Üçtəpədəki köçkünlər: Qaz xətti çəkmək üçün rüşvət tələb edirlər

30 ilə yaxındır bu kənddə məskunlaşan köçkün və yerli sakinlər hələ də qaz balonlarından və odundan istifadə edirlər

“30 ilə yaxındır ki, burda məskunlaşmışıq, ərazimizə hələ də qaz çəkilməyib. İyirmiyə yaxın ailə əziyyət çəkir”.

Bunu Meydan TV-yə Göygöl rayonunun Üçtəpə kəndi ərazisində məskunlaşan Kəlbəcər köçkünləri deyir.

“Yuxarı tərəf qazlaşdırıldı, aşağı tərəf yaddan çıxdı”

“Kəndin yuxarı tərəfini qazlaşdırdılar, dedik, biz də köçkünük, lap elə tutaq ki, köçkün deyilik, insanıq, biz də bu ölkənin vətəndaşıyıq, bizim də haqqımızdır o qazdan istifadə etmək, bir halda ki, kəndin o başına qaz çəkmisiz, gətirin, bu başına da çəkin. Dedilər, gözləyin...” – şikayətçilər deyir.

Kəndin aşağı tərəfindəki yaşayış məntəqəsində 10 köçkün ailəsi, təxminən 10 yerli və kənardan gəlib məskunlaşan ailə yaşayır. Təxminən 30 ilə yaxındır ki, bu ərazidə yaşayış mövcuddur. Sakinlər deyir ki, onların şikayəti elə hamısının adından çatdırılsın.

Təxminən 30 ilə yaxındır ki, bu ərazidə yaşayış var

Təxminən 30 ilə yaxındır ki, bu ərazidə yaşayış var

Mənbə: meydan.tv

“Dəfələrlə partlayış olub”

Köçkünlər deyir, mavi yanacaq olmadığından qaz balonlarından istifadə etmək məcburiyyətindədilər. Bu isə onların həyatını dəfələrlə təhlükəylə üz-üzə qoyub:

“Yay-qış qaz balonu işlədirik. Dəfələrlə patlayış olub. Dağətəyi yerdir, soyuqlar tez düşür, elektrik cihazları qoşmağa məcbur oluruq. Naqillər yüklənir, qısaqapanma yaranır. Demək olar ki, hər evdə 2-3 uşaq var, onların da həyatı təhlükəyə düşür”.

Köçkünlər iddia edir ki, evlərin qazlaşdırılması üçün onlardan rüşvət istənilir:

“Deyirlər, 2 min manatdan yığın, gələk, qaz probleminizi 1 ayın içərisində həll edək. Bu qaz xəttini çəkmək dövlətin, məmurun vəzifəsidirsə, vətəndaş niyə pul toplamalıdır? İş yeri yox, gəlir yeri yox, adamlar səhər açılanda fikirləşir ki, günortaya çörəyi hardan tapıb süfrəyə qoysun, bunlar vətəndaşı soymaqla məşğuldurlar. Dövlətin görməli olduğu işləri də vətəndaşlara yükləyirlər”.

"Kəndin yuxarı tərəfini qazlaşdırdılar, bizim tərəfi yox"

"Kəndin yuxarı tərəfini qazlaşdırdılar, bizim tərəfi yox"

Mənbə: meydan.tv

Mavi yanacaq olacaq

Köçkünlər dəfələrlə Gəncə şəhər Qaz İstismarı Sahəsində olduqlarını deyirlər. İki gün əvvəlsə aidiyyəti qurumlara rəsmi məktubla müraciət ediblər.

Gəncə Regional Qaz İstismarı İdarəsindən bildirilib ki, Üçtəpə kəndi çoxdan qazlaşdırılıb. 2016-cı ildə isə kəndin yuxarı hissəsinə - Kəlbəcər köçkünlərinin məskunlaşdığı əraziyə qaz xətti çəkilib. Həmin vaxt 85 abonentlik yaşayış məntəqəsində hər br abonent üçün sayğac və fərdi tənzimləyicilər də quraşdırılıb. Hazırda sakinlərinin şikayətçi olduğu ərazidə də qazlaşdırma işləri aparılması nəzərdə tutulub. Ancaq bu işlər növbəli şəkildə həyata keçirilir.

"İş yeri, gəlir yeri yox, adamlar səhər açılanda fikirləşirlər ki, çörəyi haradan alıb süfrəyə qoysun"

"İş yeri, gəlir yeri yox, adamlar səhər açılanda fikirləşirlər ki, çörəyi haradan alıb süfrəyə qoysun"

Mənbə: meydan.tv

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/cafyct

Ən çox baxılan