Günel Əliheydərova problemin həlli üçün çox yerə müraciət edib

Mənbə: Meydan TV

Başlıq: Günel Əliheydərova problemin həlli üçün çox yerə müraciət edib

Şəkidə ailə: Müvəqqəti qalmağa yer tapanda sevinirik

“Vəziyyətimiz inanılmaz dərəcədə ağırdır...”

Evsizliyin əziyyətini yaşayan Şəki sakini Günel Əliheydərova problemin həlli üçün çox yerə müraciət edib. Tez-tez yaşayış yerini dəyişməli olan altı nəfərlik ailənin səsini eşidən olmayıb.

“Bir taxtda 6 nəfər yatırıq”

30 yaşlı qadın xüsusilə son iki ildə çox mübarizə apardığını deyir. Evsizlik ailəni çarəsiz vəziyyətdə qoyur. Onlar yaşayış yerini az qala, hər ay dəyişmək məcburiyyətində qalırlar: “Heç vaxt evimiz olmayıb. Orda-burda yaşayırıq. Yaxınların, qohumların evinə sığınırıq. Bir gün dayımgilə, bir gün həyat yoldaşımın əmisigilə üz tuturuq. Kim müvəqqəti yaşamağa yer təklif eləsə, razılaşırıq. Yaşamağa konkret ev yoxdu, qapı-qapı gəzirik”.

Günel Əliheydərova bildirir ki, kirayə qalmağa maddi imkanları yoxdur. Onsuz da çətinliklə dolanırlar. Ailə yaxınların mərhəmətinin ümidinə qalıb:

“İndi qaldığımız yer çox rütubətlidir. Uşaqlar havasızlıqdan əziyyət çəkir. Amma çarə də yoxdur. Müvəqqəti qalmağa yer tapanda sevinirik. İnanın, taxtda 6 nəfər yatırıq. Uşaqların yatmağa yeri yoxdu. Səhərə qədər gözümə yuxu getmir. Qaldığımız otaq çox nəm çəkir. Vəziyyətimiz inanılmaz dərəcədə ağırdı”.

"Uşaqlar havasızlıqdan əziyyət çəkir"

"Uşaqlar havasızlıqdan əziyyət çəkir"

Mənbə: Meydan TV

“Cavab verdilər ki, Şəkidə ev yoxdur”

Ailə problemin həlli üçün Prezident Administrasiyası, Heydər Əliyev Fondu da daxil çox yerlərə müraciət edib:

“Son illər bu işlə lap ciddi məşğul oluruq, gedib-gəlirik. Prezident Aparatına müraciət eləmişəm hətta. Dəfələrlə Şəkinin İcra Hakimiyyətinə getmişəm. Mehriban Əliyevaya qədər yazmışam. Bizimlə maraqlanan yoxdur. Mehriban Əliyevaya müraciətim İcra Hakimiyyətinə yönləndirilmişdi. Ordan mənə cavab verdilər ki, Şəkidə ev yoxdur”.

Günel Əliheydərovanın fikrincə, Şəki Rayon İcra Hakimiyyəti problemi həll etmək istəmir. Qadın hesab edir ki, rayon rəhbərliyinin onlara kömək etmək istəyi olsa, alternativ variantlar barədə də düşünüb, çarə tapa bilərlər:

“Heç bir tədbir görmürlər. Biganə yanaşırlar. Deyirlər, heç torpaq da verə bilmərik. Hər vasitədən istifadə eləmişik. Rəsmi müraciət də olub. Cavabda yazırlar ki, nə vaxt imkan olarsa, nəzərə alarıq. Elə bil, başdan eləyirlər bizi. Vəziyyətimizi anlamaq istəmirlər”.

Günel Əliheydərovanın fikrincə, Şəki Rayon İcra Hakimiyyəti problemi həll etmək istəmir.

Günel Əliheydərovanın fikrincə, Şəki Rayon İcra Hakimiyyəti problemi həll etmək istəmir.

Mənbə: Meydan TV

“Çox vaxt sup yeyirik”

Əliheydərovlar ailəsində 3 qız, 1 oğlan uşağı böyüyür. Uşaqlar hələ məktəb yaşına çatmayıb. Böyük övladın 6 yaşı var, evin sonbeşiyi 6 aylıqdır:

“Kiçik övladımın ürəyində problemlər var. Onu müalicə elətdirməyə çalışırıq. Kasıb ailəyik. Çox pis dolanırıq. Kənardan heç bir kömək yoxdu. Həyat yoldaşım fəhlədi. Təhsilsizik, iş tapmaq da olmur. Çox vaxt sup yeyirik. Ümumiyyətlə, gündə üç dəfə qidalana bilmirik. Uşaqlara doyunca yemək verməyə gücümüz çatmır. Hər günü birtəhər yola verməyə çalışırıq”.

Günel xanım deyir ki, həyat yoldaşının ofisiant kimi işlədiyi vaxtlar da olur. Nə iş olsa, imtina etmirlər. Çünki evə pul gətirmək lazımdır: “İndi Şəkidə karantin rejimidi, heç yerə gedə bilmir. Bir aydı ünvanlı sosial yardım alırıq. Bunun üçün də uzun müddət mübarizə aparmışıq, gedib-gəlmişik. Amma 190 manatı vermədilər. Yayda yoxladıq, bizə düşmədi. Həyat yoldaşım o gün ayrıca bu iş üçün getmişdi. İdarədə heç kimi tapmamışdı. Yenə ümidimizi itirmirik”.

"Həyat yoldaşım o gün ayrıca bu iş üçün getmişdi"

"Həyat yoldaşım o gün ayrıca bu iş üçün getmişdi"

Mənbə: Meydan TV

İcra Hakimiyyəti nə deyir?

Şəkinin icra başçısının müavini, İcra Hakimiyyətinin şəhər təsərrüfatı şöbəsinin müdiri vəzifəsini icra edən Nizami İsmayılov ailənin problemi ilə bağlı cavab məktubunda bildirib ki, İcra Hakimiyyətinin mənzil fondunda boş və ya istifadəsiz mənzil yoxdur. Ona görə də Əliheydərovların tələbinin icrası hazırda mümkün deyil: “Gələcəkdə əlavə imkanlar yaranarsa, müraciət nəzərə alınacaq”.

Şəki şəhər İcra Hakimiyyəti başçısının birinci müavini Həsən Həsənov da bir müddət əvvəl ailəyə eyni cavabı verib.

" Çox vaxt sup yeyirik"

" Çox vaxt sup yeyirik"

Mənbə: Meydan TV

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/0wpg8f

Ən çox baxılan