Eşqin Əliyev

Mənbə: Meydan TV

Başlıq: Eşqin Əliyev

Qazi: Mərkəzi Hospital resept yazır, imkansızlıqdan dərmanları ala bilmirəm

Eşqin Əliyev deyir, ağrıdan bəzən başını divarlara çırpır, qışqırır, ağlayır, dadına çatan olmur

Ağstafa sakini Eşqin Əliyev İkinci Qarabağ Müharibəsi zamanı Şuşa uğrunda döyüşlərdə yaralanıb. Döyüşdən kəllə-beyin travması və bədənindəki çoxlu qəlpələrlə qayıdıb. Əvvəllər Mərkəzi Hospitalda müalicə alıb. Hazırda da ayda bir dəfə Mərkəzi Hospitala gedir, ona müalicələr təyin olunur, lakin keçmiş döyüşçü imkansızlıq üzündən müalicələrini davam etdirə bilmir:

“Orda yalnız müayinə olunuram, resept yazılır, göndərirlər evə, deyirlər, müalicəni özün et. Mənim də imkanım yoxdur. Verdikləri reseptləri gətirib atıram evə... Hər gün üstümə təcili yardım gəlir, xəstəxanaları gəzdirirlər. Ağrıdan başımı divara vururam, qışqırıram, ağlayıram, əsəblərim pozulub, psixologiyam pozulub. Müharibə bitdi, dağılışdıq, hamı evinə kontuziyayla, bir yığın dərdlə qayıtdı, bir psixoloq qapını döymədi ki, mənim psixoloji sarsıntılarım azalsın. Biganə münasibət məni hər gün öldürür”.

“Dərdimi kimə deyim, bilmirəm”

Eşqin Əliyevin 30 yaşı var. Müharibəyədək fəhləliklə məşğul imiş. İndi sağlamlığı işləməyə də imkan vermir. Üstəlik də ailə, məişət qayğıları onu sıxır:

“Ailəliyəm, azyaşlı qızım var, heç bir maddi tələbatını ödəyə bilmirəm. Bir qardaşım var, o da ailəlidir, xəstədir, valideynlərim xəstədir, imkansızlıqdan anamı da müalicə etdirə bilmirdik, dayılarım Rusiyadan gəldi, götürüb apardılar yanlarına ki, müalicə etdirsinlər. Yaşadığım ev bərbad vəziyyətdədir. Dərdimi kimə deyim, bilmirəm”.

Eşqin Əliyev əslində dərdini deməyə bəzi ünvanlara üz tutur, ancaq qapılar üzünə bağlıdır. Onun sözlərinə görə, müharibədən sonra dəfələrlə Ağstafa Rayon İcra Hakimiyyətinə gedib, icra hakimiyyətinin başçısıyla görüşmək istəyib, ancaq deyir, bir dəfə də olsun icra başçısı onu qəbul etməyib.

“Ailəliyəm, azyaşlı qızım var, heç bir maddi tələbatını ödəyə bilmirəm"

“Ailəliyəm, azyaşlı qızım var, heç bir maddi tələbatını ödəyə bilmirəm"

Mənbə: Meydan TV

“Axtaran yoxdur ki, burda bir Şuşa döyüşçüsü var”

“Hər dəfə bir bəhanəylə qapıdan geri qaytarırlar, başçının yanına buraxmırlar. 15 gündür ki, ora da getmirəm. Bu boyda rayonun başçısı olan bəndə bir dəfə demir ki, mənim ərazimdə Şuşa döyüşçüsü, qazi var, bir görüm niyə gəlib, nə dərdi var... Evin çörək gətirəni mən idim, bütün qayğılar mənim üstümdə idi. Müharibəyə gedəndən valideynlərim kommunal borcları ödəyə bilməyiblər. O vaxtdan indiyə 500 manatadək qazpulu yığılıb. 60 manat işıqpulu borcumuz var. Hər gün işıq, qaz idarələrindən gəlirlər, işığı, qazı kəsməklə hədələyirlər. “Şuşanı aldıq, Qarabağı azad etdik” deyib qürurlanırlar, ancaq Şuşanı, Qarabağı alan oğlanlar sürünürlər, orda canını, gəncliyini, sağlamlığını itirənlərə sayğı deyilən şey yoxdur”, - qazi gileylənib.

Eşqin Əliyev deyir ki, müharibədən qayıdandan sonra ailəsinə cəmi üç dəfə ərzaq yardımı olunub. Ərzaq bağlaması bir dəfə Heydər Əliyev Fondu, bir dəfə Ağstafa Rayon İcra Hakimiyyəti, bir dəfə isə hansısa şirkətdən gəlib. Ancaq qazi deyir, onun dərdi yemək yox, sağlamlığıyla bağlıdır. O, əsaslı müalicə olunmaq istəyir ki, yaşasın, çalışsın, ailəsinin yanında olsun...

İcra hakimiyyəti qaziylə maraqlanacaq

Ağstafa Rayon İcra Hakimiyyətindən Meydan TV-yə bildirilib ki, icra hakimiyyətinin başçısı Seymur Orucov mütəmadi olaraq qazi və şəhid ailələriylə maraqlanır, onları ziyarət edir. Elə iki gün əvvəl başçı Düzqışlar və Kolayır kəndlərində olub, belə ailələrlə görüşüb, onları narahat edən problemlərlə maraqlanıb, problemlərin həlli üçün tapşırıqlarını verib. “Qurum tez bir vaxtda Eşqin Əliyevin də sosial problemləriylə maraqlanıb imkanları daxilində köməkliyini göstərməyə hazırdır. Səhhətiylə bağlı maddi problemləri varsa, keçmiş döyüşçü yaxşı olar ki, “YAŞAT” Fonduna müraciət etsin”, - deyə bildirilib.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/sipd92

Ən çox baxılan