Füzulinin Bala Bəhmənli kənd sakini 39 yaşlı Nizaməddin İsmayılov

Mənbə: Meydan TV

Başlıq: Füzulinin Bala Bəhmənli kənd sakini 39 yaşlı Nizaməddin İsmayılov

“Qarabağ alınsa, bilərəm ki, oğlumun ruhu şaddır”

Əsgər anası: "Bizim övladlarımız fəxri ad alsınlar, amma aldıqları şəhid adı olmasın"

Füzulinin Bala Bəhmənli kənd sakini 39 yaşlı Nizaməddin İsmayılov sentyabrın 27-də axşam saatlarında Füzuli uğrunda gedən döyüşlərdə həlak olub.

Nizaməddin İsmayılov baş gizir olub və 23 ilə yaxın müddətdə hərbidə qulluq edib.

Anası Nabat İsmayılova deyir ki, həmin 23 ilin 4 ilə yaxınını İraqda xidmət edib, sülhməramlı olub. Bir il öncə təqaüdə çıxmalı imiş, amma bunu istəməyib və xidmətini daha 2 il müddətinə artırıb:

“Elə bil əsgər kimi gəlmişdi dünyaya, elə əsgər kimi də getdi. Təqaüdə çıxmaq istəmədi. İraqdan qayıdandan sonra Şükürbəylidə xidmət etməyə başladı. Dünən yanına qrad düşüb. Onu ayağından və kürəyindən yaralayıb. Elə orada da həyatını itirib. Tək olmayıb, 3 əsgəri ilə birgəymiş. İkisinin həyatını xilas edə bilib, özü və yanındakı əsgərlərdən biri isə şəhid olub. Gah da deyirlər, “hamısı ölüb”. Biz də dəqiq bilmirik”.

Nabat İsmayılova deyir ki, oğlunun ən böyük arzusu Qarabağa Azərbaycan bayrağını sancmaq olub. O ümid edir ki, müharibə qələbə ilə nəticələnəcək və oğlunun arzusu həyata keçəcək:

“İnanıram ki, onun ruhu bunu duyacaq. Yoxsa, mənə də dözmək çətin olar. Qarabağ alınsa, bilərəm ki, oğlumun ruhu şaddır”.

Nizaməddin İsmayılov 10 il əvvəl ailə həyatı qurub. 2 övladı var. Böyüyü 9 yaşındadır:

“Məni, balalarını, xanımını gözüyaşlı qoyub getdi. Nə deyim, o yolu seçmişdi, vətən yolunda da şəhid oldu. Elə bil gözləyirdi də. Getmədən öncə qardaşı arvadına vəsiyyət edib, indi böyütdüyümüz şəkli verib ona. Deyib, “ölsəm başdaşıma bunu qoyun”. 6 medalı var idi. Daha birini də almaq istəyirdi. İndiki medal da oldu 7-ci, planı doldurdu. Elə həmin medal da sonu oldu”.

Nabat İsmayılovanın bir arzusu var. O, Qarabağın tam azad olmasını istəyir:

“Torpaqlarımız geri alınsın, balalarımız düşmən əlinə düşməsin, analar qutu görməsin. Bizim övladlarımız fəxri ad alsınlar, amma aldıqları şəhid adı olmasın”.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/fx2fl3

Ən çox baxılan