Ağa Seyid Əli Mir Əbu Talib oğlu Mir Mövsümzadə – el içində Mir Mövsüm ağa yaxud “Ətağa” kimi tanınır. Amma qohumlarının dediyinə görə, o, hələ sağlığında “Ətağa” sözünü sevməyib. Hələ sağlığında insanların pənah gətirdiyi bir insan olan Mirmövsüm ağa vəfat etdikdən sonra da İçərişəhərdəki evi və Mərdəkandakı məzarı ziyarətgah kimi fəaliyyət göstərməyə başlayıb.
Məlumatlara görə, 1950-92-ci ildə məzar baxımsız vəziyyətdə olduğundan Hacı Nizam, Hacı Tahir və Hacı Şəmşir adlı Şüvəlan sakinlərinin köməyi ilə məzar yenidən qurulur. O vaxtdan bu günə ziyarətgaha gələnlərin ardı-arası kəsilmir. Ziyarətgahda namaz qılmaq üçün məscid, qurban kəsmək üçün yerlər, uzaqdan gələnlər üçün istirahət yerləri mövcuddur. Bundan başqa, ziyarətgahda qan bankı da fəaliyyət göstərir ki, könüllü donorlar bu ziyarətgaha gələrək qan verə bilirlər.
Bu yazı cəhaləti irəli çəkmək deyil, Mirmövsüm ağa haqqında məlumatlandırmaq xarakteri daşıyır.
