"Heyvanlarımızı doyura bilmirik"

Mənbə: meydan tv

Başlıq: "Heyvanlarımızı doyura bilmirik"

Kəndli: İcra hakimiyyəti deyir ki, hara istəyirsən şikayət elə

“Rayondakı məmurlar niyə belə arxayındırlar?”

“İllərdir icarəyə götürüb istifadə etdiyim torpaqları kənd bələdiyyəsinin sədri öz adına keçirib. İndi mənə həmin torpaqdan istifadə etməyə izin vermir. Heyvanlarım örüşsüz qalıb. Torpağımda əkdiyim yoncanın, o qədər meyvə ağaclarının da arxasına keçiblər”.

Tovuzun Abulbəyli kəndinin sakini Ziyafət Nəcəfova belə deyir. Şikayətçi bildirir ki, böyük ailəsini bu torpaq sahəsi ilə dolandırırmış. İndi 10-dan çox insanın həm iş yeri, həm də dolanışığı əlindən alınıb.

“Kəndliyik, əkib-becərir, mal-heyvan saxlayır, dolanırdıq. Əlimizdən başqa heç nə gəlmir. Bu il Türkiyədən qoz, fındıq və müxtəlif ağac şitilləri gətirmişdik. Hamısı qalıb əlimizdə, əkə bilmirik. Sahəmizdə yonca əkmişdik, qalıb. Heyvanlarımızı doyura bilmirik”.

Ziyafət Nəcəfova deyir ki, düzdür, torpağı ona icarəyə vermişdilər, onun deyil. Ancaq satılması ilə bağlı da hər hansı məlumat verməyiblər ki, başlarına bir çarə tapsınlar:

“7 il bundan əvvəl idi. Dolana bilmirdim. O vaxtkı icra başçısı Tofiq Zeynalovun yanına getdim. Dedim ki, bəs çətindir yaşamaq, özüm də şəhid bacısıyam, vallah, dolana bilmirəm. İcra başçısı da mənə örüş və əkin sahəsi kimi bu torpaq sahələrini verdi. İcarə pulunu da vaxtlı-vaxtında ödəyirdim. Soruşdum ki, bəs bunun axırı necə olacaq? Dedilər ki, narahat olma, nə zamansa bu torpaq hərraca çıxarılıb, satılsa, o zaman birinci sizə məlumat veriləcək. Hətta birinci sizə təklif ediləcək. Siz almasanız, sonra başqasına verilə bilər”.

"İllərdir icarəyə götürüb istifadə etdiyim torpaqları kənd bələdiyyəsinin sədri öz adına keçirib"

"İllərdir icarəyə götürüb istifadə etdiyim torpaqları kənd bələdiyyəsinin sədri öz adına keçirib"

Mənbə: meydan.tv

Şikayətçi deyir ki, buna görə illərdir arxayındır. Bu torpaqlarda özünə şərait yaradıb, əkin-biçin işləri görüb, ağac əkib və s. Təzəlikcə gəliblər ki, çıxın, torpaq Abulbəyli kəndinin bələdiyyə sədri İxtiyar Namazovun adınadır, onundur:

“Bizə niyə məlumat verilmədiyini soruşanda da bildirdilər ki, yox bir, sədr özünə torpaq alanda sizdən icazə almalıdır? Mən demirəm, məndən izin alsınlar. Bu torpağı götürəndə də deyilmişdi ki, sizə məlumat veriləcək. Nə olsun icarəyə götürmüşük? Belə olanda adamı saymırlar? Bizə təklif edilsəydi, bəlkə alacaqdıq? Olmaz axı. Birtəhər borc-xərc edib, alardıq. Çünki illərdir alışmışıq, gəlib-gedir, o qədər iş görmüşük”.

Ziyafət Nəcəfova bildirir ki, əkin-biçin bir yana, 32 baş iribuynuzlu heyvanı da ac qalıb. Onları otarmağa yeri yoxdur:

“Bəs mən dərdimi hara deyim? Bələdiyyəyə getdim, dedilər ki, gəl bu ərazini sənə icarəyə verək. Sotuna 5 manatdan haqq ver. Deyirəm, çoxdu, gücüm çatmır. Cavab verir ki, o zaman get, heyvanına tövlədə bax. Məndə harda idi, o imkan? Mənə qarşı zorakılıq edirlər. İcra hakimiyyətinə müraciət edirəm, deyirlər, “get hara istəyirsən şikayət et”. Bu ölkənin yiyəsi yoxdur? Rayondakı məmurlar niyə belə arxayındırlar?”.

"Sahəmizdə yonca əkmişdik, qalıb"

"Sahəmizdə yonca əkmişdik, qalıb"

Mənbə: meydan.tv

Z.Nəcəfova Prezident İlham Əliyevə müraciət edir. Xahiş edir ki, onun torpağının geri qaytarılması üçün göstəriş versin:

“Xahiş edirəm, mənə kömək edilsin. İcra hakimiyyətinə də gedirəm, deyirlər, hara istəyirsən şikayət et, onsuz da hökumət yoxdur. Lap istəyirsən İlham Əliyevə denən. Mən də qalmışam pis vəziyyətdə bilmirəm dərdimi kimə deyim. Rayonlarda bir qram qorxu qalmayıb, insanları incidir, veclərinə də almırlar. Deyirlər, pul verib almışıq buraları. Mən təkcə şitillərə 1000 manatdan artıq pul vermişəm. Hamısı evdə çürüyür. Vaxtı da keçir, əkə bilmirəm”.

Meydan TV məsələyə münasibət öyrənmək üçün Tovuz Rayon İcra Hakimiyyəti ilə əlaqə saxlayıb. İcra hakimiyyətindən məsələni araşdıracaqlarını bildiriblər.

Tovuzun Abulbəyli kəndinin bələdiyyə sədri İxtiyar Namazov Meydan TV-nin zənglərinə cavab verməyib. Bələdiyyədən isə bu barədə məlumatsız olduqlarını söyləyiblər.

"Mən təkcə şitillərə 1000 manatdan artıq pul vermişəm".

"Mən təkcə şitillərə 1000 manatdan artıq pul vermişəm".

Mənbə: meydan.tv

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/wrcr91

Ən çox baxılan