İtkin pilotun oğlu: Atam hanı, niyə gəlmir?

Rəşad Ayakişiyevin ailəsi onun haqqında keçmiş zamanda danışmalarını istəmir

Source: Meydan TV

"Atam hanı, niyə gəlmir?" Bu sözləri hər gün ailəsinə yoxa çıxmış “MİQ-29” təyyarəsinin pilotu polkovnik-leytenant Rəşad Atakişiyevin 7 yaşlı oğlu Turqut verir.



BBC News Azərbaycanca

”nın əməkdaşları itkin düşən pilotun ailəsinə baş çəkib. Onların yazdığına görə, qapı açılan kimi dəhlizdə səs eşidən Turqut qapıya qaçır, o, qapını döyənin atası olduğunu düşünür.

Rəşad Atakişiyevin idarə etdiyi təyyarə iyulun 24-də hərbi təlimlər zamanı yoxa çıxıb. Qohum-qonşu toplaşıb birlikdə itkin düşmüş pilotun yolunu gözləyirlər.

Rəşad Atakişiyev 1984-cü ilin yanvarın 7-də doğulub. O, Heydər Əliyev adına Hərbi Akademiyada təhsil alıb.

İkinci kursda oxuyanda ilk dəfə ixtisaslaşma tətbiq olunub və aviasiyaya sənəd vermiş 200 nəfər arasında Rəşad da olub. Seçilmiş 35 nəfərlə birgə təhsil alıb, ancaq diplom alan cəmi 5 nəfərdən biridir.

Copy of Untitled Design.png
Rəşad Atakişiyev

Həyat yoldaşı və anası onun haqqında mediaya danışmaq istəmədiklərini bildiriblər. Onlar ailə üzvlərinə Rəşad haqda danışmağın onun yoxluğu ilə barışmağa bərabər olduğunu deyiblər.

24 iyul Rəşad Atakişiyev üçün adi iş günlərindən biri olub. Ayın 29-u ezamiyyətə çıxmalı olan pilot həmin günlərdə evdə "ezamiyyət öncəsi çox uçmaq istədiyini" deyib.

Ailə üzvləri deyib ki, o, bunu məzuniyyətdən öncə bir az çox işləyib, yayda məzuniyyətə getməyin "haqqını verməklə" əlaqələndirib.

Pilotun qayınatası Qabil Hüseynlinin sözlərinə görə, həmin gün kürəkəninin 4 təlim-məşqi olub:

"Gündüz uçuşları və sonuncu – dördüncü gecə saat 10 radələrinə təsadüf edən o sirli təlim-məşq uçuşu. Üç təyyarənin qatıldığı təlimin sonuna az qalmış Rəşad Atakişiyevin təyyarəsindən cavab ala bilməyən yoldaşları bunu qərargaha xəbər veriblər. Lakin yanacaqları az olduğu üçün onlar itmiş yoldaşlarının təyyarəsini həmin vaxt axtara bilməyiblər. Xəbərdarlıqdan sonra yardım gəlsə də, ərazidə axtarış aparılsa da, nə təyyarəni, nə də pilotu gördüm deyən olmayıb”.

Copy of Untitled Design (1).png
Keçmiş dövlət müşaviri, politoloq Qabil Hüseynli

Qabil Hüseynli söyləyib ki, səhəri gün davam edən axtarışlar zamanı məşq yoldaşlarının verdiyi məlumatlar əsasında 20-25 kilometrlik ərazidə akvatoriya müəyyənləşdirilib və axtarışlar başlayıb:

"Lakin iyulun 29-u axşamadək həmin ərazini şumlasalar da, (axtarış zamanı detallı axtarışa şumlama deyirlər), heç bir dəmir cismə rast gəlinməyib. Ancaq həm də deyirlər ki, ilkin baxış zamanı axtarış yerində dənizdən təyyarə quyruğu hissələri və aviasiya yanacağı tapılıb. Bu da təyyarənin dənizə düşməsi ehtimalını artırıb".

Rəsmilər qəzanın ilkin səbəbi kimi ailəyə "quşun təyyarənin kabinasına çırpılması nəticəsində təyyarənin suya düşməsi"ni ehtimal etdiklərini deyiblər.

Lakin ailə üzvləri Rəşad Atakişiyevin danışıqlarından xatırlayırlar ki, o, həmişə gecə baş verən təyyarə qəzalarında quşların çırpılmasını istisna edib. Qabil Hüseynli deyir ki, kürəkəni hər zaman gecə uçmağın yaxşı olduğunu vurğulayıb: "Deyirdi ki, gecə uçmaq yaxşıdır, çünki gecələr quş uçmur".

Rəşadın təcrübəli pilot olmasından danışan yaxınları deyiblər ki, Azərbaycan Ordusunun 100 illiyi münasibətilə keçirilmiş hərbi paradda o, MİQ-29-la göydə performans göstərib:

"Ordunun 100 illiyində o, bu təyyarə ilə çox gözəl çıxış etmişdi. Halbuki bu təyyarələrlə o cür çıxış etmək çox çətindir. Azərbaycanda isə MİQ-29-la o hərəkətləri edə bilən iki nəfər var- biri Rəşad, digəri də onun komandiri".

Ailə üzvləri deyiblər ki, onlara bildirilən ehtimal səbəblərdən digər ikisi – pilotun səhhətində problemlərin və təyyarənin qəzalı vəziyyətdə olmasıdır.

Rəşad Atakişiyevin son zamanlar səhhətindən və ya ürəyindən şikayətçi olmasını evdə heç kim xatırlamır. Üstəlik, təlim-məşq toplantılarından əvvəl hərbçilərin sağlamlıq vəziyyətinin yoxlandığını da vurğulayıblar.

Lakin ailənin cavabsız qalan suallarından biri budur: "Özünü pis hiss edən, uzun illər uçuş təcrübəsi olan pilot 4 təlim uçuşu ərzində bu barədə niyə bircə dəfə də olsun məlumat verməyib?"

Təyyarənin nasazlığına gəlincə, Qabil Hüseynli deyib ki, Rəşad Atakişiyev həmişə təyyarə texniklər tərəfindən uçuşa hazırlanarkən azı bir saat əvvəl yoxlama yerinə gedib:

"Hazırlıq prosesində həmişə iştirak edib, təyyarənin vəziyyətini özü yoxlayıb və hər şeyin qaydasında olub-olmamasına özü nəzarət edib. Dəfələrlə olub ki, texniklərdən sonra təyyarədə texniki nasazlığın olduğunu aşkarlayıb.

Copy of Untitled Design (2).png
Polkovnik-leytenant Rəşad Atakişiyev

Rəşad həmişə təyyarəni təhvil alar, hər şeyin qaydasında olduğunu yoxlayıb sonra imza atardı. Ancaq indi biz bilmirik ki, bu dəfə o təyyarəni yenə yoxlayıb təhvil alıb, ya yox".

“BBC News Azərbaycanca”nın əldə etdiyi məlumata görə, bir neçə il əvvəl təmas xətti boyunca uçmaq əmri verilmiş bir təyyarədə sistem pozuntusu olduğundan o geri qayıdıb.

2008 və 2010-cu illərdə Azərbaycanın iki hərbi təyyarəsi qəzaya uğrayıb, 2008-ci ildə 2 pilot, 2010-da bir pilot həlak olub.

2008-ci ildə qəzaya uğrayan təyyarə Xəzərin 60 kilometr dərinlikdəki hissəsinə düşüb.

Pilotun qayınanası Məhbubə xanım deyib:

"Çox dərinə düşüb tapa bilmirik dedilər, anladıq. Bəs, axi, deyirlər bu təyyarə 27 metr dərinlikdədir. Bunu tapmaq niyə bu qədər çətin oldu?"

Məhbubə xanımın sözlərinə görə, əvvəlcə onlara deyiblər ki, "Atakişiyevin kaskası tapılıb". Daha sonra isə deyiblər ki, "nəyinsə qırıqları imiş, kaskaya bənzədiblər".

Ailə isə hər bir halda ümid edir ki, Rəşad Atakişiyev sağdır və qayıdacaq. Onlar inanırlar ki, o son anda özünü xilas edib.

"Qoçaqdı, Rəşad özünü qorumaq üçün nəsə etməmiş olmaz", – qayınanası Məhbubə xanım ümidlə deyir.

Çoxlu cavabsız suallarla üz-üzə qaldıqlarını deyən ailə üzvlərinin Rəşad Atakişiyev qayıdanadək, ya da barəsində dəqiq bir xəbər bəlli olanadək bir istəyi var: “Rəşad haqqında keçmiş zamanda danışılmasınlar”.

Ana səhifəXəbərlərİtkin pilotun oğlu: Atam hanı, niyə gəlmir?