Gülbacı Musayeva

Mənbə: Meydan TV

Başlıq: Gülbacı Musayeva

“İllərdir anamı qucağımızda gəzdiririk, TSEK 1-ci qrup əlillik təyin etmir”

Məqalə yeniləndi:  19 Fevral 2021

Lerik sakini rayon Tibb-Sosial Ekspertiza Komissiyasından şikayətçidir

“İllərin yataq xəstəsidir, hamama qucağımızda aparırıq, çimizdiririk, yeməyini özümüz yedirdirik, danışa bilmir, hərəkət edə bilmir. Bununla belə, ona birinci qrup əlillik təyin etmək istəmirlər”.

Lerik sakini Ramiz Ağayev Meydan TV-yə anasından bəhs edir. Deyir, 82 yaşlı Gülbacı Musayeva yataq xəstəsidir. İllərdir ki, dövlət ona gözünə görə 2-ci qrup əlillik təyin edib. Lakin ananın son 3 ildə həm də yataq xəstəsinə çevrilməsi ona birinci qrup əlilliyin təyinatı üçün rayon Tibbi-Sosial Ekspertiza Komissiyasına müraciət etməyə səbəb olub. Tələb olunan sənədləri hazırlayıb aidiyyəti qurumlara göndərsələr də, Gülbacı Musayevaya 1-ci qrup əlillik təyin edilmir. Ramiz Ağayev deyir, 3 ildir ki, Lerik Rayon Tibbi-Sosial Ekspertiza Komissiyası 82 yaşlı anasını süründürür.

“82 yaşlı xəstə qadını süründürürlər”

“Anamın çeşidli xəstəlikləri var, həmin xəstəliklər üzündən yataqdan qalxa, özünü fiziki idarə edə bilmir. Lerik Rayon Mərkəzi Xəstəxanasında həkim komissiyasından keçib, meyarları 1-ci qrup əlilliyə uyğun olduğuna görə sənədləri Lerik Rayon Tibbi-Sosial Ekspertiza Komissiyasına göndərilib. Ancaq uzun müddətdir ki, komissiya bizə imtina vərəqəsi göndərir və hər dəfə də imtina vərəqəsində eyni cümləni qeyd edir: “... Qeydiyyat üzrə tibb müəssisəsinə yaxınlaşmağınız tövsiyə edilir”. Xəstə anamı qucağımıza alıb yaxınlaşırıq xəstəxanaya, deyirik, bizə belə cavab verilib. Həkim deyir, biz hər şeyi qanun çərçivəsində yazıb göndərmişik, xəstəlikləri, vəziyyəti birinci qrup əlillik meyarlarına uyğundur. Sizi sadəcə, süründürürlər”, - şikayətçi deyir.

"Uzun müddətdir ki, komissiya bizə imtina vərəqəsi göndərir və hər dəfə də imtina vərəqəsində eyni cümləni qeyd edir"

"Uzun müddətdir ki, komissiya bizə imtina vərəqəsi göndərir və hər dəfə də imtina vərəqəsində eyni cümləni qeyd edir"

Mənbə: Meydan TV

Lerik Rayon Tibbi-Sosial Ekspert Komissiyasından bildirilib ki, Həkim Məsləhət Komissiyasının TSEK-ə göndərdiyi “Forma-88”-də məlumat çatışmazlıqları var. Ancaq bu çatışmazlıqların nədən ibarət olduğu bildirilməyib.

Lerik Rayon Mərkəzi Xəstəxanasından isə bildirilib ki, Gülbacı Musayeva Həkim Məsləhəti Komissiyası tərəfindən müayinə olunub, bu barədə göndəriş “Tibbi-Sosial Ekspert Komissiyasına göndərişlər”in reyestrinə daxil edilib.

“Ailə üzvləri məhkəməyə müraciət edə bilər”

Hüquqşünas Namizəd Səfərov deyir, əgər xəstə özünü fiziki idarə edə bilmirsə, hərəkət zamanı başqalarının köməyinə ehtiyacı yaranırsa, bu, artıq birinci qrup əlilliyin təyin olunması üçün səbəbdir:

““Əlilliyin müəyyən olunması meyarlarına dair” Əsasnaməyə görə, bir şəxsin orqanizm funksiyalarının nəzərə çarpan dərəcədə pozulması nəticəsində digər şəxsin daimi xidmətinə, yardımına ehtiyacı yaranarsa, bu hal həmin xəstəyə birinci dərəcəli əlilliyin təyin olunması üçün meyar hesab olunur”.

Hüquqşünas xəstənin ailə üzvlərinin məhkəməyə müraciət etməsini tövsiyə edir: “Məhkəmədən birinci qrup əlilliyin təyin edilməsinin öhdəlik kimi Lerik Rayon Tibbi-Sosial Ekspertiza Komissiyasının üzərinə qoyulmasını tələb edə bilərlər”.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Məqalə yeniləndi:  19 Fevral 2021
Bölmələr:  
qısa linklər:   http://mtv.re/oj5us2

Ən çox baxılan