Mənbə: Meydan Tv

İki aylıq hamilə qadın aldığı xəsarətlərə görə reanimasiyaya yerləşdirilib

Məqalə yeniləndi:  26 Avqust 2019

Onun ailəsi tərəfindən döyüldüyü ehtimal edilir

Qax rayon sakini, 27 yaşlı A.V aldığı xəsarətlərlə xəstəxananın reanimasiya şöbəsinə yerləşdirilib. Rayonun kəndlərindən birində yaşayan qadının 2 aylıq hamilə olduğu, aldığı xəsarətlər nəticəsində uşağını itirdiyi bildirilir.

Kənd sakinlərinin Meydan TV-yə verdiyi məlumata görə, hadisə avqustun 17-də baş verib. Ailə münaqişəsi zəminində 27 yaşlı qadın ağır xəsarətlər alıb. Hadisə ilə bağlı müxtəlif şayiələr var. Qadının intihar etdiyi də deyilir.

Meydan TV əməkdaşı Qax Rayon Mərkəzi Xəstəxanasında olub və zərərçəkənin reanimasiya şəbəsində olduğunu müəyyənləşdirib. Lakin A.V-nin anası jurnalistə ətraflı məlumat verilməsinə mane olub. Bildirib ki, qızı pilləkənlərdən yıxılıb, ağır xəsarət alıb.

Ancaq adının açıqlanmasını istəməyən xəstəxana əməkdaşı jurnalistə söyləyib ki, qadın xəstəxanaya gətirilərkən atası həkimə “onu siz öldürməsəniz, özüm öldürəcəyəm” deyib.

Qonşuları isə Meydan TV əməkdaşına deyib ki, qız əvvəllər nişanlı olub, nişanlısı rəhmətə gedəndən sonra qonşu kəndə ərə verilib. Lakin sonradan baldızı onun telefonundan nişanlısına bənzəyən oğlanla şəkillərini aşkarlayıb və hadisə də bundan sonra baş verib:

“Əvvəl əri döyüb, sonra gətirib atıb evlərinə. Atası da döyüb, ürəyi soyumayıb başına daşla çırpıb, divara vurub. Qızın ağzından qan gəlib, huşunu itirib. Onu xəstəxanaya aparandan sonra atası da özünü asmaq istədi. Hadisənin utancından yaşamaq istəmədiyini deyirdi. Ancaq qonşular ipdən aldılar”.

Qonşuların sözlərinə görə, qadın tanınmış iş adamlarından birinin qardaşı qızı olduğundan məsələnin ictimailəşdirilməsinin qarşısını almağa çalışırlar.

Səhiyyə Nazirliyinin mətbuat xidmətinin məlumatına görə, qadın başın müxtəlif nahiyələrində travmalar, boğazda boğulma izləri ilə xəstəxanaya daxil olub. Müayinə zamanı onun 2 aylıq hamilə olduğu müəyyən edilib. Lazımi tibbi yardım göstərildikdən sonra xəstənin huşu qayıdıb. Hazırda reanimasiya şöbəsindədir, vəziyyəti orta-ağır stabil qiymətləndirilir.

Daxili İşlər Nazirliyinin (DİN) mətbuat xidmətinin regional üzrə baş inspektoru Mahir Məsimovun verdiyi məlumata görə, hadisə münaqişə zəminində baş verib. İlkin məlumatda bildirilir ki, qadın başını divara vurub. Məsələ ilə bağlı Qax Rayon Prokurorluğunda araşdırma aparılır.

Meydan TV əməkdaşı məsələ ilə bağlı Ombudsman Aparatının qaynar xəttini məlumatlandırıb.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Məqalə yeniləndi:  26 Avqust 2019
Bölmələr:  
qısa linklər:   http://mtv.re/q51tx1

Ən çox baxılan