yerli sakinlər

Mənbə: meydan tv

Başlıq: yerli sakinlər

Gədiklilər: Bir-birimizi kanala sallayıb, su çəkirik

Məqalə yeniləndi:  26 İyun 2019

Qubanın Gədik kəndində üç əsas problem:qaz xətti yox, suyun həcmi tələbatı ödəmir, Sovetdən qalan çürük elektrik dirəkləri...

“Yaydır, su yoxdur. Meşədən bulaqdan çəkilən iki su xətti də azlıq edir. Su ehtiyatı aşıb-daşan meşənin kənarında yaşayırıq, ancaq suyu kənddəki kanaldan vedrəylə, iplə çəkirik”.

Qubanın Gədik kəndinin sakinləri Meydan TV-yə kəndin sosial problemlərindən danışırlar. Kəndin də problemi bir deyil, iki deyil... Su qıtlığı, elektrik dirəklərinin çürüklüyü, qaz xəttinin yerli-dibli olmaması...

Gədik köhnə kənddir. Evlərin sayı 200-ə çatıb. Ailə təsərrüfatları ilbəil artır. Buranın əhalisi əsasən heyvandarlıq və əkin işləriylə məşğul olurlar. Ancaq susuzluq əhalini hər iki məşğuliyyətdən məhrum edir. Üstəlik, meşədəki iki bulaqdan gələn içməli su da tələbatı ödəmir.

“Heyvanlar kanala tökülüşüb tələf olur”

Kənd sakini Rəsul Mehrəliyev deyir, susuzluq üzündən həm insanların, həm də heyvanların həyatı təhkülədədir:

“Adamlar bir-birlərini kanala sallayırlar ki, vedrəylə su çəksinlər. Bəzən kanalın suyu çox dərin olur, bir anın içində kanala düşüb boğula bilərik. Kanaldan kəndə heyvanlara su daşımaq çətin olduğu üçün, məcbur oluruq ki, heyvanları kanala tərəf aparaq, suyu çəkib vedrəylə qoyaq qarşılarına, içsinlər. Kanalın ətrafı açıqdır deyə, heyvanları idarə edə bilməyəndə kanala tökülüşürlər, tələf olurlar... Susuzluq bu kənddə əsl faciədir...”.

Kəndçinin evi

Kəndçinin evi

Mənbə: meydan.tv

Kanalın suyu içməli deyil, yalnız məişətdə istifadəyə yarayır. Ancaq kənd sakini Nəzakət Allahverdiyeva deyir, su qıtlığı üzündən adamlar bu suyu duruldub özləri də içirlər:

“Yekə su çəlləklərinin ağzına pambıq qoyuruq, suyu ordan süzürük, pambıq qapqara olur. Bunu azı on dəfə təkrarlamaq lazımdır ki, su durulsun. Sonra da xörəyə, çaya istifadə edirik. Paltarlarımızı yuyuruq, bu suyu duruldub çimirik...”

Külək əsəndə naqillər yerlə sürünür

Kənddə elektrik məsələsi də insanların həyatını təhlükə altına alıb. Dirəklər çürüyüb, kəndin bəzi yerlərində vaxtilə külək səbəbindən aşan dirəkləri taxta parçaları əvəz edir. Bir-birinə calaq olmuş köhnə, çürük naqillər sarmaşıq kimi ağaclara, hasarlara dolaşıb. Kənd sakinləri deyir, əsasən yağışlı günlərdə küçəyə çıxmaq təhlükəlidir:

“Yağış yağanda, külək əsəndə naqillər yerlə sürünür, ətrafa qığılcımlar saçır. Hər il cərəyanvurmadan heyvan tələf olur. Keçən il kəndin ortasında bir atı cərəyan vurub öldürdü. Uşaqların məktəb vaxtı yağışlı, küləkli aylara təsadüf edir. Uşağı evdən buraxırıq, evə qayıdınca nigaran qalırıq ki, görəsən hansı məhəllədə cərəyan vurdu?”

Kənddə elektrik xətlərindəki qısaqapanmalardan və nasazlıqlardan tez-tez yanğın baş verir.

İşıq dirəyi

İşıq dirəyi

Mənbə: meydan.tv

Və qaz problemi...

Bu problem kənddə ta əvvəldən mövcuddur. Gədiyin qonşuluğundakı kəndlərin qaz problemləri zamanla həllini tapsa da, bu kəndə hələ Sovet vaxtından qaz xətti çəkilməyib. Gədiklilər də qışboyu evlərini kəndin yaxınlığındakı meşədən odun qırıb gətirməklə qızdırmalı olur. Yayda isə həyətdə qaz balonu alışdırırlar.

Qubanın Su-Kanal İdarəsindən bildirilib ki, Gədikdə su kranları var və əhali meşənin bularlarından çəkilmiş su ilə təmin olunur. Yayın qurlaqlığı bulaqlardakı suyun səviyyəsini də aşağı salır. Bu səbəbdən də kənddə suyun təzyiqi azalır. İdarə problemi həll etmək üçün alternativ yollar axtarır.

Qubanın İcra Hakimiyyətindən bildirlib ki, kəndlərin qazlaşdırılması işləri davam etdirilir. Bu işlər növbəli şəkildə həyata keçirilir. Elektrik naqillərinə gəlincə, bununla bağlı qurum rayon işıq idarəsinə məktubla müraciət edib.

Gədik kəndi

Gədik kəndi

Mənbə: meydan.tv

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Məqalə yeniləndi:  26 İyun 2019
Bölmələr:  
qısa linklər:   http://mtv.re/a2s73x

Ən çox baxılan