Türkiyənin Feriköy qəbristanlığında 30-a yaxın cümhuriyyətçinin məzarı var. Onlar AXC dövrünün deputatları, nazirləri, incəsənət adamlarıdır. Cümhuriyyətçilərin məzarlarının təmirə, bərpaya ehtiyacı olanda daha çox fiziki şəxslər yardım göstərir.
Azərbaycan Xalq Cümhuriyyətinin ilk maliyyə naziri olan Əbdüəli bəy Əmircanın məzarının üstünə yığılan qurumuş ağac qırıntılarını, tozu-torpağı təmizləyən yazar, kolleksiyaçı Dilqəm Əhməd deyir ki, cümhuriyyətçilərdən kimin qohumu varsa, onların qəbrinə baxılır, təmiz saxlanılır, heç kimi olmayanların qəbirləri də toz-torpaq içində olur.
