Ölkədə təhsil müəssisələri bağlanıb
Ermənistan hökuməti bazar günü ölkədə ilk koronavirus hadisəsi qeyd edildikdən sonra 8 Marta qədər bütün məktəbləri, universitetləri və uşaq bağçalarını bağlayıb, – “Azatutyun” xəbər verir.
Rəsmilər bildirib ki, bir gecədə virusa müsbət test verən 29 yaşlı bir erməni vətəndaşı ilə təmasda olan üç yüz nəfərə yaxın insan karantinə alınıb.
Baş nazir Nikol Paşinyan deyib ki, koronavirusa yoluxmuş kişi və həyat yoldaşı cümə günü xüsusi Tehran-Yerevan reysi ilə qonşu İrandan təxliyə olunan Ermənistan vətəndaşları arasında olub.
“Onun vəziyyəti yaxşıdır”,- Paşinyan “Facebook” səhifəsində yazıb: “Xəstəxanaya gedəndə qızdırması olub. Hal-hazırda hərarəti yoxdur … Yeri gəlmişkən, xəstənin həyat yoldaşında koronavirus qeydə alınmayıb”.
“Virusun yayılmasının qarşısını almaq üçün bütün lazımi tədbirlər görülür”,- Paşinyan əlavə edib: “Xəstə ilə əlaqədə olmuş bütün insanlar təcrid olunacaqlar”.
Səhiyyə naziri Arsen Torosian bundan sonra jurnalistlərə açıqlamasında deyib ki, 32 nəfər Tsaghkadzor kurort şəhərindəki istifadə olunmayan bir otelə aparılıb və orada karantinə alınıb. “Onların arasında yoluxmuş kişinin yanında oturan Tehran-Yerevan reysinin sərnişinləri və onu Yerevan xəstəxanasına aparan təcili yardım heyəti də var”, – o deyib.
Torosian İrandan Ermənistana qayıdan bütün ermənilərin karantində qalmağının mənasız olduğunu deyib. Bu həftə ən azı 130 nəfər Tehrandan gətirilib, – Azadlıq Radiosunun Erməni Xidməti bildirir.
Ermənistan hökuməti fevralın 24-də Ermənistanın İranla sərhədi qismən bağlamağı və virusun İslam Respublikasında sürətlə yayılmasının qarşısını almaq üçün iki ölkə arasında uçuşları dayandırmağı qərara alıb. Sərhəd əsasən İran yük maşınları tərəfindən həyata keçirilən ticarət daşımaları üçün açıq olaraq qalır.
Torosyanın sözlərinə görə, iranlı yük maşınlarının sürücülərinin Ermənistan vətəndaşları ilə fiziki təması “minimuma endirilib”. Ermənistan Səhiyyə Nazirliyinin sözçüsü şənbə günü bildirib ki, sürücülər erməni həkimlərinin 24 saat nəzarəti altındadır və onlara polis müşayiəti olmadan nəqliyyat vasitələrini tərk etməyə icazə verilmir.
Paşinyan daha sonra erməni uşaq bağçalarında, məktəblərdə və universitetlərdə dərslərin bir həftə dayandırıldığını deyib. “Nə baş verdiyini anlamaq üçün bizə bir az vaxt lazımdır”,- o, “Facebook”da canlı yayımda deyib.
Baş nazirin “sakit olmağa” çağırışlarına baxmayaraq Ermənistanda aşkar edilən ilk koronavirus hadisəsi xəbəri Yerevanda insanlar arasında panikaya səbəb olub. Bəzi supermarketlərdə ərzaq məhsullarının karantin səbəbindən bitməsinə səbəb olub. Tətil edəcək insanlar Tsaghkadzordakı otel rezervasyonlarını yerli oteldə karantində olan insanlar tərəfindən yoluxma qorxusu ilə ləğv ediblər.
Paşinyan insanların qorxularını aradan qaldırmaq üçün başqa bir “Facebook” yayımında 32 nəfərin xarici aləmdən tamamilə təcrid olunduğunu deyib. Baş nazir həyat yoldaşı və uşaqları ilə axşam saatlarında Ermənistan paytaxtından 57 kilometr şimalda yerləşən məşhur xizək kurortuna gedəcəklərini və Tsaghkadzordakı epidemioloji vəziyyətin normal olduğunu göstərmək üçün orada bir gecə keçirəcəyini deyib.
