DİN: İt döyüşlərini təşkil edənlər saxlanıldı

Dörd nəfər saxlanılıb, iki nəfərlə bağlı əməliyyat tədbirləri davam etdirilir

Source: Google

Azərbaycanda it döyüşlərini təşkil etməkdə şübhəli bilinən şəxslər saxlanılıb. Bu barədə məlumatı Daxili İşlər Nazirliyinin Mətbuat Xidməti yayıb. Xidmətin əməkdaşı, polis leytenantı Zeyni Hüseynovun verdiyi məlumata görə, bir neçə gün əvvəl sosial şəbəkələrdə naməlum şəxslər tərəfindən təşkil edilmiş it döyüşlərini əks etdirən videogörüntülər DİN tərəfindən nəzarətə götürülüb və araşdırılıb. Nəticədə həmin videogörüntülərdə əks olunan 6 nəfərin hər birinin şəxsiyyəti müəyyən edilib və onlardan 4-ü – Bakı şəhər sakinləri Rüfət Bədəlov, Hüseyn Əliyev, Murad Ştayev və Qubadlı rayon sakini, hazırda Sumqayıt şəhərində yaşayan Mətləb Əliyev saxlanılıblar. “Onların törətdikləri əmələ uyğun məsuliyyətin müəyyənləşdirilməsi istiqamətində araşdırmalar aparılır və nəticəsindən asılı olaraq hüquqi qiymət veriləcəkdir. Digər 2 nəfərin saxlanılması üçün əməliyyat-axtarış tədbirləri davam etdirilir”, – məlumatda bildirilir.

İlkin araşdırmalarla o da müəyyən edilib ki, sosial şəbəkələrdə yayılan videogörüntülər 2019-cu ilin sentyabr ayında Abşeron rayonu ərazisində çəkilib.

Sosial şəbəkələrdə yayılan məlumatlarda o da qeyd olunurdu ki, döyüşə hazırlanan itlərə narkotik maddələr verilir.

Ana səhifəSosialDİN: İt döyüşlərini təşkil edənlər saxlanıldı